قال صحيح ايه رايك في البت ******
ياعم
البت دي شمال
دي انا سمعت عنها من الواد ****
كااااااااااااااااات
تعالي بقي كده يا ناصح ياللي قولت ع البنت شمال
اولا انتا مين عشان تحدد البنت شمال ولا يمين
ولا انتا مثلا ملاك برئ مبتغلطتش
فأول ما البنت غلطت بقيت تحكم عليها
وتقول انها شمال
طيب سيبك من ده كله انتا واد تقي ومتغلطتش
انتا اصلا تعريف كلمة شمال ايه بالنسبالك ؟
يعني انك تسوء سمعه بنت وتقول انه شمال او مش محترمه
علي اساس ايه ؟
كلام سمعته لا شوفتها بعينك بتعمل حاجه غلط ولا من شكلها ولا لبسها ولا ايه
طب بص انا مش هقولك الا حاجه واحده بس
" إن الذين يرمون المحصنات الغافلات المؤمنات لعنوا في الدنيا والآخرة ولهم عذاب عظيم ( 23 ) يوم تشهد عليهم ألسنتهم وأيديهم وأرجلهم بما كانوا يعملون ( 24 ) يومئذ يوفيهم الله دينهم الحق ويعلمون أن الله هو الحق المبين ( 25 ) "
عارف يعني ايه
يعني لو بنت محترمه وانتا قولت عليها شمال
لمجرد انك تبان الواد البرنس اللي مفيش زيه للي عارف كل حاجه وخايف علي صاحبه
والبنت دي محترمه
ف مبروك ليك يا برنس
انتا ربنا هيلعنك في الدنيا والاخره
ده كمان ليك عذاب عظيم
ده ربنا بيقولك كده
عشان جبت سيره بنت واتكلمت علي عرضها
بكلام وحش وقله ادب
والبنت دي اصلا كويسه ومحترمه
طبعا انتا هتقولي دلوقتي
انا خايف علي صاحبي ولازم احذره
وان وان وان
طب انتا عارف انك عشان تحذر صاحبك زي ماتقول وتخوض ف اعراض نساء ان ده له شروط
انك ع الاقل يبقي معاك 4 شهداء بده الا تكون فاسق ومينفعش تتاخد شهادتك
"وَالَّذِينَ يَرْمُونَ الْمُحْصَنَاتِ ثُمَّ لَمْ يَأْتُوا بِأَرْبَعَةِ شُهَدَاءَ فَاجْلِدُوهُمْ ثَمَانِينَ جَلْدَةً وَلَا تَقْبَلُوا لَهُمْ شَهَادَةً أَبَدًا ۚ وَأُولَٰئِكَ هُمُ الْفَاسِقُونَ"
شوفت ان كلمه شمال اللي بتقولها ع اي بنت لبسها ضيق
او مش عجباك
او او او
من اسباب التافهه اللي في دماغك
حسابها عند ربنا ازاي
ومقامها كبير ازاي
طبعا هتقولي دلوقتي لا انا متاكد
انا شوفتها بتخرج وماشيه مع فلان وعلان
وهي شمال وانا متاكد
طيب تعالي اقوولك حاجه
ايه رايك في صاحبك اللي ماشي مع 4 بنات في وقت واحد
برنس صح!!!!!!
واد مخلص ومقطع سمكه وديلها صح
طبعا هتقولي اه
لو انتا شايفه كده وانه واد مخلص وبرنس يبقي تروح وتسكت ومتكلمش عن بنت ابدا تاني
لان الولد بيغلط زي البنت
وزي ماهتقول ع ده برنس وجامد
فالبنت دي برنسيسه وجامده باردو
من وجهه نظرك
لان مبادئ مبتجزاش
الغلط غلط علي الولد والبنت
مينفعش تحكم علي حد انه برئ وتعاقب حد تاني علي نفس الذنب
الاتنين غلط او الاتنين صح
طبعا لو انتا انسان محترم وشايف صاحبك ده شمال وقليل الادب
احب اقولك
من ستر عبدا في الدنيا ستره الله في الاخره
انتا مش ملاك ومفيش حد ملاك
بني ادم كلهم خطائين
يعني لما تشوف بنت بتغلط ومتاكد منها
مش تديها لقب شمال
بالعكس
استرعليها وانصحها
يمكن ملقتش حد كويس ف حياتها
وبطل تحكم علي ناس بمظاهرهم انتا متعرفش اللي في قلوبهم ولا حياتهم ايه
ولا حتي ظروفهم اوعي تقول علي حد شمال
سواء كنت بنت او ولد وبتقرا الموضوع ده
صدقني هتتردلك
لو ولد هتترد فيك في اختك , في والدتك, في مراتك , في بنتك
لو بنت ممكن تترد فيكي ,في بنتك
الكلمه دي بقت تطول اي حد حتي لو محترم
لازم يطلعوا في عيونهم شمال
واخيرا بقي
يقول ابن القيم : "من عاب اخاه بذنب لم يمت حتى يفعله"
يعني من اخر لو قولت علي حد شمال او عيبت علي حاجه بيعملها
مش هتموت الا لما يحصلك ده
0 التعليقات :
إرسال تعليق